სექტემბრის ბოლოს სრულდება ექვსთვიანი ვადა, რა დროშიც საქართველოს ეროვნული სააგენტოს კვლევის სამსახურს ბათუმში კულტურული მემკვიდრეობის ძეგლის სტატუსის მისანიჭებლად 23 კონკრეტული სახლის მდგომარეობა უნდა შეესწავლა.
სამსახურს ამ დროში უნდა მოემზადებინა დასკვნა წარდგენილი სახლების მნიშვნელობის, მდგომარეობის, ისტორიული ან კულტურული ღირებულების შესახებ, რასაც საბჭოს წარუდგენდა შესაბამისი გადაწყვეტილების მისაღებად. თუმცა ასეთი დასკვნა ჯერ მზად არ არის. სააგენტომ ამ დასკვნის მომზადებისთვის ვადა კიდევ ექვსი თვით გააგრძელა.
კულტურული მემკვიდრეობის სააგენტოს ჯერ კიდევ არ გადაუწყვეტია, წარდგენილი 23 სახლიდან რამდენი იმსახურებს ძეგლის სტატუსს ბათუმში. გადაწყვეტილება ამ სახლებიდან ჯერ ერთთან დაკავშირებითაც არ არსებობს. სააგენტოში ამბობენ, რომ საკითხზე ისევ მუშაობენ.
ძეგლის სტატუსის მისანიჭებლად წარდგენილი სახლები კომპანია „გეოგრაფიკმა“ ბათუმის მერიის დაკვეთით 2015 წელს შეარჩია. 2015 წლიდან 2019 წლამდე, ბათუმის მერიას, აჭარის კულტურული მემკვიდრეობის დაცვის სააგენტოსა და ეროვნულ სააგენტოს შორის გრძელვადიანი გადარჩევა-დაზუსტების შემდეგ, სააგენტომ გადაწყვიტა და 2019 წლის მარტში ამ სახლებს კულტურული მემკვიდრეობის ობიექტის სტატუსი მიანიჭა. შესაბამისად, დარჩენილია ბოლო ეტაპი – შენობებისთვის ძეგლის სტატუსის მინიჭება.
კულტურული მემკვიდრეობის ობიექტის მინიჭების შემდეგ, კონკრეტული შენობების მიმართ კულტურული მემკვიდრეობის დაცვის შესახებ კანონით გათვალისწინებული ყველა დამცავი რეჟიმი ამოქმედდა, რაც ამ სახლების ათვისებით დაინტერესებული მშენებლებისგან დაცვას უზრუნველყოფდა. როგორც სააგენტოს დანართშია მითითებული, ამ სახლების უმრავლესობა არქიტექტურის თვალსაზრისით ღირებულია.
ბათუმში 23 ისტორიულ სახლს კულტურული მემკვიდრეობის ობიექტის სტატუსი მიენიჭა
