9 სექტემბერს, ბათუმის ბულვარში, „ალი და ნინოს“ ქანდაკების მიმდებარედ, ზღვის სანაპიროზე, ელისო ბოლქვაძის საქველმოქმედო კონცერტი გაიმართა. იუნესკოს მშვიდობის არტისტი ღია ცის ქვეშ ბათუმელი მსმენელის წინაშე შოპენის და შუბერტის მუსიკალური ნაწარმოებებით წარსდგა. კონცერტში მონაწილეობა მიიღო სოფო ხალვაშმა და საქსაფონზე რამდენიმე ცნობილი კომპოზიცია შეასრულა.
ელისო ბოლქვაძის საქველმოქმედო კონცერტი ბათუმის ბულვარში
„მოხარული ვარ, რომ ბათუმის ბულვარმა უმასპინძლა ისეთი მაღალი დონის პიანისტს, როგორიც ქალბატონი ელისო ბოლქვაძეა. ნამდვილად განსხვავებული საღამო შედგა – ჩვენ მოვისმინეთ ცნობილი კლასიკური ნაწარმოებები არაჩვეულებრივ გარემოში, სპეციალურად მოწყობილ სივრცეში. ამავდროულად, კლასიკური მუსიკის საღამო მთლიანად საქველმოქმედო ხასიათს ატარებდა, მზად ვართ დავუთმოთ ბულვარის სივრცე მსგავსი ტიპის კონცერტებს. დიდი მადლობა მინდა გადავუხადო ყველა ადამიანს, ვინც ბავშვების დასახმარებლად მცირედი წვლილი მაინც შეიტანა“- განაცხადა ბულვარის დირექტორმა ირაკლი ჯინჭარაძემ.
ელისო ბოლქვაძის საქველმოქმედო კონცერტი ბათუმის ბულვარში
„ძალიან მიხარია, რომ ასეთი კარგი საღამო შედგა სოფო ხალვაშთან ერთად, ჩვენ შევძელით, რომ ზღვის სანაპიროზე არაორდინალურ გარემოში კონცერტი გაგვემართა ბათუმელებისთვის, რისთვისაც დიდ მადლობას ვუხდით ბათუმის ბულვარს მხარდაჭერისა და ხელშეწყობისთვის“ – განაცხადა ელისო ბილქვაძემ.
ბათუმის შავი ზღვის ხელოვნების რიგით მეშვიდე ფესტივალის ფარგლებში გამართული საქველმოქმედო კონცერტიდან შემოსული თანხა სრულად მოხმარდება 26-ე საჯარო სკოლის ინკლუზიური ჯგუფის შშმ ბავშვებს.
ღონისძიება ფონდის „ლირა“ სსიპ „ბათუმის ბულვარი“-ს ერთობლივი ორგანიზებითა და ბათუმის მერიის მხარდაჭერით გაიმართა.
ელისო ბოლქვაძის საქველმოქმედო კონცერტი ბათუმის ბულვარში
