ხულოს მუნიციპალიტეტში, გოდერძის ალპური ბაღის ტერიტორიაზე, სანერგის მოწყობისთვის ბათუმის ბოტანიკურ ბაღს 107 ათასი ლარი აქვს გამოყოფილი. შესაბამისი მომსახურების შესყიდვაზე ტენდერია გამოცხადებული. სანერგის მოწყობა გამარჯვებულთან ხელშეკრულების გაფორმებიდან 70 დღეში უნდა დასრულდეს.
არსებული პროექტის მიხედვით, სანერგისთვის გათვალისწინებულ ტერიტორიაზე 30 ძირი წიწვოვანი ხე უნდა გაიჩეხოს.
პროექტის მიხედვით, გრუნტი ტერასებად მოიჭრება და ბეტონის ბორდიურები გაკეთდება; სავალი ნაწილი დაიფარება ნამსხვრევი ქვებით [შებენით]; საჩრდილობლად მავთულის ბადე გაკეთდება, რომელიც ალუმინის ჩარჩოზე იქნება დამაგრებული; დაგეგმილია რეზერვუარის მოწყობა და სანერგემდე წყლის მიყვანა.
ტენდერში წინადადებების მიღება 14 აგვისტოს დაიწყება და 19 აგვისტოს დასრულდება.
ბათუმის ბოტანიკურ ბაღს ცალკე კიდევ სამი ტენდერი აქვს გამოცხადებული გოდერძის ალპური ბაღის ტერიტორიაზე საკემპინგე სივრცის [საპირფარეშო, განათება], ავტოპარკინგის შემოღობვის და მყარი კონსტრუქციის მოწყობის სამუშაოებზე, ასევე არსებული ადმინისტრაციული შენობის რეკონსტრუქცია [სარდაფის, აივნების, წყალმიმღების შემოღობვის]-რემონტისთვის.
ამ ტენდერების საერთო თანხა კი 93 ათასი ლარია.
გოდერძის ალპურ ბაღში მოსაწყობი სანერგე / ვიზუალი / რენდერი პროექტიდან
