ბათუმის მერიის მუნიციპალური სერვისების სააგენტოში „ბათუმელებს“ უთხრეს, რომ ქალაქის მასშტაბით ყველა სავაჭრო ობიექტი გაფრთხილებულია იმის შესახებ, რომ პირველი აპრილიდან ცელოფნის პარკების რეალიზაციისთვის დაჯარიმდებიან. ობიექტი, რომელიც უკვე გაფრთხილებულია და ცელოფნის პარკი რეალიზაციაში მაინც ექნება, 500 ლარით დაჯარიმდება. განმეორების შემთხვევაში – 1000 ლარით. ორივე შემთხვევაში აკრძალულ პარკებს ჩამოართმევენ.
„როგორც ჩვენთვისაა ცნობილი, ზოგიერთი ობიექტის მეპატრონე ამბობს, რომ ისინი არ არიან გაფრთხილებულები. თუმცა ჩვენი სამსახურის თანამშრომლები 2018 წლის ოქტომბრიდან აფრთხილებენ სავაჭრო ობიექტებს და უტოვებდნენ საინფორმაციო ფურცელს, სადაც გარკვევით ეწერა, რომ 2019 წლის პირველი აპრილიდან ნებისმიერი სისქის პოლიეთილენის პარკის რეალიზაციისთვის ობიექტი დაჯარიმდება.
ჩვენს სააგენტოში 28 ადამიანია მონიტორინგის ჯგუფში და სავაჭრო ობიექტების გაკონტროლებას მომავალი კვირიდან [8 აპრილიდან – ავტ.] დავიწყებთ. ობიექტს, სადაც რეალიზაციაში იქნება ცელოფნის პარკები, დავაჯარიმებთ“, – გვითხრეს ბათუმის მერიის მუნიციპალური სერვისების სააგენტოს პრესსამსახურში.
პირველი აპრილიდან საქართველოში პოლიეთილენის [ცელოფნის] პარკების გაყიდვა, ასევე, მომხმარებლისთვის შეთავაზება სავაჭრო ქსელში, აკრძალულია. ბათუმში აკრძალული ცელოფნის პარკების რეალიზაციაზე კონტროლი მერიის მუნიციპალური სერვისების სააგენტოს ევალება.
საქართველოს კანონმდებლობით:
მაღაზიის მესაკუთრე ვალდებულია გაფრთხილებიდან 10 დღის განმავლობაში ამოიღოს ქსელიდან აკრძალული პარკები. წინააღმდეგ შემთხვევაში, ის 500 ლარით დაჯარიმდება და მოხდება შესაბამისი პროდუქციის კონფისკაცია.
დარღვევის განმეორების შემთხვევაში, მეწარმე სუბიექტი დაჯარიმდება 1 000 ლარის ოდენობით და ასევე, მოხდება შესაბამისი პროდუქციის კონფისკაცია.
სავაჭრო ქსელში დასაშვებია მხოლოდ ბიოდეგრადირებადი და კომპოსტირებადი პარკი − ეს არის მთლიანად ან ნაწილობრივ ბიოლოგიური, განახლებადი ნედლეულის საფუძველზე წარმოებული, ბიოდეგრადაციასა და კომპოსტირებას დაქვემდებარებული პარკი, რომელიც აკმაყოფილებს შესაბამისი ტექნიკური რეგლამენტით დადგენილ მოთხოვნებს და აქვს შესაბამისობის დამადასტურებელი დოკუმენტი.
საქართველოს კანონმდებლობით, ბიოდეგრადირებად და კომპოსტირებად პარკებზე დატანილი უნდა იყოს შემდეგი სავალდებულო ინფორმაცია:
[checklist]
- წარწერა − „ბიოდეგრადირებადი და კომპოსტირებადი პარკი“;
- ბიოდეგრადირებადი და კომპოსტირებადი პარკის მწარმოებელი;
- ბიოდეგრადირებადი და კომპოსტირებადი პარკის შემადგენლობა.
[/checklist]
წარწერა − „ბიოდეგრადირებადი და კომპოსტირებადი პარკი“ პარკზე შეიძლება გაკეთდეს მხოლოდ იმ შემთხვევაში, თუ მისი შესაბამისობის შეფასება განხორციელებულია უფლებამოსილი შესაბამისობის შემფასებელი ორგანოს მიერ და პარკი შეესაბამება ტექნიკური რეგლამენტის მოთხოვნებს.
ინფორმაცია პარკზე უნდა განთავსდეს გამოსაჩენ ადგილას, ხედვის ერთ არეალში. დაუშვებელია ინფორმაციის გადაფარვა სხვა წარწერით ან ნახატით.
პარკზე განთავსებული ინფორმაცია მომხმარებლისთვის უნდა იყოს ადვილად წასაკითხი და გასაგები. ნიშანდებამ და აღწერილობამ შეცდომაში არ უნდა შეიყვანოს მომხმარებელი.
პარკზე შეიძლება დატანილ იქნეს სხვა ინფორმაციაც, თუ იგი არ შეამცირებს სავალდებულოდ განსათავსებელი ინფორმაციის აღქმადობას.
საქართველოში აკრძალულია არა მარტო ცელოფნის პარკების რეალიზაცია, არამედ ადგილზე წარმოებაც და იმპორტიც.
პოლიეთილენის პარკების წარმოების აკრძალვის გამო საწარმოების უმეტესობა გაჩერდა, ნაწილი კი სატესტო რეჟიმში, ისიც მცირე დატვირთვით მუშაობს. შესაბამისად, უმუშევარი დარჩა ასობით ადამიანი, რომლებიც საწარმოებსა თუ დისტრიბუციაში იყვნენ დასაქმებულები.
მეწარმეები ამბობენ, რომ საწარმოების გადაიარაღებისთვის სახელმწიფომ მათ საკმაოდ მცირე დრო მისცა, მაშინ, როცა თავად სახელმწიფომ ამ დროში ვერ უზრუნველყო ისეთი ლაბორატორიის ამოქმედება, სადაც შემოწმდება პარკი არის თუ არა ნამდვილად ბიოდეგრადირებადი.
მათივე თქმით, სამინისტროდან იყო დაპირება, რომ პოლიეთილენის [პლასტიკის] პარკების წარმოება აპრილიდან სრულად არ აიკრძალებოდა და მათ დროს სექტემბრამდე მისცემდნენ გადაიარაღებისთვის. თუმცა, მეწარმეების თქმით, მარტის თვის ბოლოს, სამინისტროში მათ უთხრეს, რომ კანონის გადავადება აღარ ესწრებოდა.
გარემოს დაცვისა და სოფლის მეურნეობის სამინისტროში „ბათუმელებს“ განუცხადეს, რომ „2019 წლის პირველი აპრილიდან კანონი შევიდა ძალაში. იქნება გაფრთხილება და შემდეგ დაჯარიმება. წარმოება ყველა შემთხვევაში აკრძალულია და ასევე აკრძალულია პოლიეთილენის პარკების საზღვარგარეთიდან შემოტანა“.
რაც შეეხება კონტროლს, სამინისტროში გვითხრეს, რომ „შესაბამისი ლაბორატორია მართლაც არ აქვთ. „თუმცა გვაქვს მოლაპარაკებები გარკვეულ ქვეყნებთან, სადაც არის ასეთი ლაბორატორიები. იქ შესაძლებელია გადავაგზავნოთ ნიმუში და სამ დღეში გვექნება პასუხი. ასე რომ კონტროლის კუთხით დაბრკოლება ამ მხრივ არ იქნება. ჩვენი ლაბორატორიაც 2019 წლის ბოლომდე იქნება გამართული – შესაბამისი სამუშაოები უკვე მიმდინარეობს“.
კანონის მიხედვით, პარკების წარმოებას გარემოს დაცვის სამინისტრო აკონტროლებს, იმპორტს – ფინანსთა სამინისტრო, ხოლო რეალიზაციას – მერია.
თუმცა, მაგალითად, თბილისის მერიაში „ნეტგაზეთს“ უთხრეს, პარკების რეალიზაციის კონტროლის ბერკეტი არ აქვთ: „თბილისის მერიას აქვს სამთავრობო სტრუქტურებთან კონცეპტუალური შეთანხმება, რომ განხორციელდება ცვლილებები და ეს ფუნქცია მერიიდან სხვა უწყებას გადაეცემა, რამდენადაც მერიას არა აქვს ბერკეტი, გააკონტროლოს პოლიეთილენის პარკების რეალიზაცია.“
საქართველოში პოლიეთილენის შემცველობის პლასტიკის პარკების რეალიზაცია, წარმოება და იმპორტი 2019 წლის პირველი აპრილიდან აკრძალულია
