ხულოს მუნიციპალიტეტში, ამ ეტაპზე, 217-ზე მეტი მილიონი ლარის საინვესტიციო და ინფრასტრუქტურული პროექტები ხორციელდება. მუნიციპალიტეტის მერია თავადაც ახორციელებს გარკვეულ პროექტებს, ითანხმებს სხვა პროექტებს, გასცემს ნებართვებს ან თანხმობას. მუნიციპალიტეტის პრეროგატივაა, ასევე, დასრულებული ობიექტების ექსპლუატაციაში გაშვება-არგაშვებაზე გადაწყვეტილების მიღება. მიმდინარე თუ დაგეგმილი მრავალმილიონიანი პროექტების ფონზე ხულოს არჩეული მერი, გოჩა მელაძე, 17 ოქტომბერს გაურკვეველ ვითარებაში გადადგა.
ყველაზე მსხვილი საინვესტიციო პროექტები დღეს ხულოში, კურორტ გოდერძიზე ხორციელდება. აჭარის ფინანსთა და ეკონომიკის სამინისტროს ინფორმაციით, „ამ ეტაპზე „გოდერძიზე“ 16 საინვესტიციო პროექტი მიმდინარეობს. კურორტზე სულ 129 მილიონი ლარის ინვესტიცია ხორციელდება, რის შედეგადაც კურორტს 1000-ზე მეტი განთავსების ადგილი შეემატება და დაახლოებით 1400 სამუშაო ადგილი შეიქმნება“.
გოდერძის განვითარებას კურირებს შპს „Goderdzi Resorts“-ი, რომლის 100% წილს აჭარის ავტონომიური რესპუბლიკა ფლობს. ამ კომპანიის დირექტორი მალხაზ მახარაძე რამდენიმე დღის წინ გაათავისუფლეს თანამდებობიდან. ის შპს „სტადიონის“ დირექტორად დანიშნეს. „სტადიონიც“ არის აჭარის მთავრობის შპს, რომელიც ასევე მრავალმილიონიან პროექტებს ახორციელებს ბათუმში – საფეხბურთო სტადიონისა და ახალი [რესპუბლიკური] საავადმყოფოს მშენებლობა.
მალხაზ მახარაძე „ბათუმელებთან“ ამბობს, რომ „შვიდი წელია მშენებლობის სფეროშია და ორთავე კომპანიის დირექტორობა არ გაუჭირდება“.
ვის ნიშნავენ შპს „Goderdzi Resorts“-ის დირექტორად, – ამის შესახებ ინფორმაცია სამინისტროს, ჯერჯერობით, არ აქვს.
კურორტ გოდერძიზე მიწის ნაკვეთები ინვესტორებს, ძირითადად, პირდაპირი წესით გადასცეს.
ხულოს მუნიციპალიტეტში სხვადასხვა ინფრასტრუქტურულ პროექტს აფინანსებენ როგორც ადგილობრივი, ასევე აჭარისა და საქართველოს ბიუჯეტებიდან.
აჭარის ავტონომიური რესპუბლიკის 2018 წლის ბიუჯეტიდან ხულოს მუნიციპალიტეტში წელს 3 297 400 ლარის სხვადასხვა სამუშაოა დაფინანსებული. მიმდინარე პროექტების შესახებ აჭარის ფინანსთა და ეკონომიკის სამინისტრომ ინფორმაცია მოგვაწოდა, თუმცა სამომავლოდ დაგეგმილი სამუშაოების შესახებ – არა. „მოთხოვნა მუნიციპალიტეტს აქვს, თუმცა მომავალი წლის ბიუჯეტის პროექტზე მუშაობა მიმდინარეობს და კონკრეტულად რომელი ღონისძიება დაფინანსდება და რამდენით, ამ ეტაპზე არ არის გადაწყვეტილი“, – გვითხრეს სამინისტროში.
ხულოს მერიაში კი „ბათუმელებს“ უთხრეს, რომ მომავალი წლისთვის 8 მილიონამდე ლარის ინფრასტრუქტურული სამუშაოების დაფინანსებას ითხოვენ, თუმცა სამინისტრომ შესაძლოა აქედან მხოლოდ მესამედი დააფინანსოს. „ველოდებით სამინისტროს პასუხს, რა რაოდენობის ტრანსფერს გამოგვიყოფენ სამომავლოდ და იმის მიხედვით შევარჩევთ პრიორიტეტებს, თუ რომელი სამუშაო დაფინანსდება“, – გვითხრეს ხულოს მერიაში.
აჭარის 2018 წლის ბიუჯეტიდან დაფინანსებული მიმდინარე პროექტები ხულოს მუნიციპალიტეტის ტერიტორიაზე:
წყარო: აჭარის ფინანსთა და ეკონომიკის სამინისტრო
ხულოს მუნიციპალიტეტმა სხვადასხვა მომსახურების შესყიდვაზე ელექტრონული ტენდერი 2017 წლის დეკემბრიდან დღემდე 110-ჯერ გამოაცხადა. აქედან არ შედგა 9 ტენდერი, დასრულდა უარყოფითი შედეგით – 4, შერჩევა-შეფასების ეტაპზეა – 3, მიმდინარეობს წინადადებების მიღება – 1 და გამოცხადებულია, მაგრამ წინადადებების მიღება არ დაწყებულა 2 ტენდერში.
ამავე პერიოდში ხულოს მუნიციპალიტეტმა ტენდერის გარეშე გამარტივებული შესყიდვა სულ სამჯერ განახორციელა [საერთო ღირებულება 128 450 ლარი].
ხულოში 9 847 400 ლარის სხვადასხვა სამუშაოს ატარებს წელს საქართველოს საავტომობილო გზების დეპარტამენტი – ძირითადად, გზები და ხიდები. ხულოს მუნიციპალიტეტის მერიაში „ბათუმელებს“ უთხრეს, რომ პროექტებში [მათ შორის ხულო-გოდერძის უღელტეხილის ახალი გზის პროექტი], რომლებიც ქვეყნის ბიუჯეტიდან ფინანსდება, მუნიციპალიტეტის ჩართულობა მინიმალურია.
პროექტები ხულოში, რომლებსაც საქართველოს საავტომობილო გზების დეპარტამენტი ახორციელებს [დეპარტამენტის ინფორმაცია]:
[checklist]
- შიდასახელმწიფოებრივი მნიშვნელობის ბათუმი(ანგისა)-ახალციხის სავტომობილო გზის კმ91+800 მონაკვეთზე დაზიანებული მიწის ვაკისის აღდგენის სამუშაოები. ვადა: 13/04/2018 – 01/10/2018. თანხა: 2 600 000 ლარი;
- ბათუმი(ანგისა)-ახალციხის საავტომობილო გზის კმ15+150 მონაკვეთზე დაზიანებული მიწის ვაკისის აღდგენის სამუშოები. ვადა: 16/05/2018 – 16/12/2018. თანხა: 374 800 ლარი;
- გოდერძის უღელტეხილი-ბეშუმის საავტომობილო გზის კმ1-კმ6 მონაკვეთის სარეაბილიტაციო სამუშაოები (1 ხიდი), ვადა: 11/12/2017 – 13/03/2019. თანხა: 4 486 900 ლარი;
- ბათუმი(ანგისა)–ახალციხის საავტომობილო გზის კმ79+500-კმ80+600 მონაკვეთის სარეაბილიტაციო სამუშოები, ვადა: 27/06/2018 – 27/11/2018. თანხა: 1 369 900 ლარი;
- ბათუმი(ანგისა)–ახალციხის ს/გზის კმ56(55+180)-ზე მდინარე აჭარისწყალზე არსებული სახიდე გადასასვლელის სარეაბილიტაციო სამუშოები, ვადა: 23/03/2018 – 23/10/2018. თანხა: 214 900 ლარი;
- ბათუმი(ანგისა)–ახალციხის ს/გზის კმ15-კმ80 ცალკეულ მონაკვეთებზე მოძრაობის უსაფრთხოების ღონისძიებების სამუშაოები, ვადა: 23/07/2018 – 23/10/2018. თანხა: 443 700 ლარი;
- ბათუმი(ანგისა)-ახალციხის ს/გზის კმ43+800-ზე და კმ65+400-ზე მონაკვეთებზე დაზიანებული მიწის ვაკისის აღდგენის სამუშაოები, ვადა: 09/08/2018 – 09/01/2019. თანხა: 357 200 ლარი.
[/checklist]
დეპარტამენტის მიერ დაფინანსებული ზოგი პროექტი ხულოში დასრულდა. მათ შორის, მაგალითად, ე.წ. „საფრის ხიდის“ დროებითი რეაბილიტაცია, რისთვისაც 2 მილიონამდე ლარი დაიხარჯა და რომლის სრული რეაბილიტაციაც დაგეგმილია ხულო-ზარზმის პროექტის ფარგლებში.
ხულო-ზარზმის ახალი გზის მშენებლობას არაბეთის ეკონომიკური განვითარების ქუვეითის ფონდი [KFAED] აფინანსებს. პროექტის მთლიანი ღირებულება, როგორც საავტომობილო გზების დეპარტამენტში გვითხრეს, 110 მილიონზე მეტი ლარია. სამუშაოები ორ ლოტად არის დაყოფილი. პირველი ლოტი – დაბა ხულოდან გოდერძის უღელტეხილამდე [69 946 268 ლარი] და მეორე ლოტი – გოდერძის უღელტეხილი-ადიგენის სოფელ ზარზმამდე [40 264 509 ლარი].
გზების დეპარტამენტის ინფორმაციით, გზის საერთაშორისო ტენდერში გამარჯვებული იტალიური კომპანია „ტოდინი“ ააშენებს, „რომელმაც სამობილიზაციო [მშენებლობის დასაწყებად მოსამზადებელი] სამუშაოები მიმდინარე წლის პირველი ოქტომბრიდან უკვე დაიწყო“.
ახალი გზის ასაშენებლად თავის დროზე შედგა განსახლების გეგმაც, რომლის მიხედვითაც კერძო მესაკუთრეებზე გასაცემი კომპენსაციის საერთო ოდენობა 5 227 609 ლარით განისაზღვრა.
საქართველოს საავტომობილო გზების დეპარტამენტის ინფორმაციით, განსახლების გეგმის 93% შესრულებულია და საკომპენსაციო თანხები გადახდილია: „განსახლების საკითხი დასკვნით ფაზაშია. დარჩენილია ზოგი მესაკუთრე, რომელსაც ქონების რეგისტრაციის საკითხი აქვს მოსაგვარებელი ან თავიანთი პრობლემები აქვთ ბანკებთან, და ა.შ.“ ამ შემთხვევაში კომპენსაციის თანხა საქართველოს ბიუჯეტიდან გაიცა.
საკომპენსაციო ხარჯები ხულოს ტერიტორიაზე განსახლების გეგმის მიხედვით:
ახალი საავტომობილო გზის ხულო-გოდერძის უღელტეხილის მონაკვეთის განსახლების ხარჯები, დამტკიცებული გეგმის მიხედვით / წყარო: გზების დეპარტამენტი
