თამარ ჩიმაკაძე პირველად სამხატვრო სტუდიაში შემთხვევით მოხვდა. ალბათ ვერც კი იფიქრებდა, რომ წლების შემდეგ მხატვრობა მისი პროფესია გახდებოდა. ყველაფერი კი იმით დაიწყო, რომ ერთ დღეს ბიძაშვილს ხატვის წრეზე მიაკითხა და გაკვეთილის მიმდინარეობისას კუთხეში დაჯდა. მხატვარ ანტონ ფილიპოვს კუთხეში მჯდომი პატარა გოგოსთვის ფურცელი და ფანქარი მიუცია. მისმა ნამუშევარმა მასწავლებელი გააოცა. ასე იქცა მხატვრობა მის პროფესიად, განუყოფელ ნაწილად.
თამარ ჩიმაკაძე
სკოლის დამთავრების შემდეგ ხელოვნების ინსტიტუტში ჩააბარა ქსოვილების მხატვარ-დიზაინერის ფაკულტეტზე. პროფესიით ხელოვანი ბოლო 12 წელია სკოლა „ნიკეში“ პედაგოგიურ საქმიანობას ეწევა. პარალელურად მუშაობს ინკლუზიური სწავლების ცენტრის სახელოსნოში შშმ ბავშვებთან, ატარებს მასტერკლასებს გამოყენებითი ხელოვნების (თექა, ბატიკა, გობელენი) დარგში და მუშაობს ინტერიერის დიზაინზე.
სასწავლო პროცესი სასიამოვნოა, მაგრამ არასაკმარისი დროა სრულყოფილი შემოქმედებისათვის. პირველი სასწავლო წელია, რაც სკოლა „ნიკეს“ ბაზაზე სტუდია „ნიკე+“ ფუნქციონირებს, რომელსაც ქალბატონი თამარ ჩიმაკაძე ხელმძღვანელობს.
– ქალბატონო თამარ, როგორ გაჩნდა იდეა სტუდის შექმნისა?
– სკოლა ნიკეში განსაკუთრებული ყურადღება ექცევა ხელოვნებას, დირექციამ (ხელმძღვანელი იზო ტაკიძე) გაითვალისწინა ბავშვების ინტერესები, გაჩნდა იდეა გამოეყენებინათ სკოლის დამატებითი ფართობი და დაარსებულიყო სკოლასთან არსებული სტუდია „ნიკე+“, რომელიც მეოთხე თვეა აქტიურ და ნაყოფიერ მუშაობას ეწევა. სტუდიის მიზანია მოსწავლის შემოქმედებითი განვითარება და რაც მთავარია – მოსწავლეებმა თავი კომფორტულად უნდა იგრძნონ ჩვენს გარემოში.
– რას გვთავაზობს სტუდია „ნიკე“?
– სტუდია გთავაზობთ მოსწავლის მრავალმხრივ განვითარებას. ჩვენი დევიზია: „სიყვარულით შეგხვდებით და სიხარულით მიგიღებთ“. ქალაქის საუკეთესო პედაგოგები მუშაობენ ჩვენს ბავშვებთან. სტუდია მუშაობს შაბათ-კვირას, 11 საათიდან 15 საათამდე.
სტუდიაში ფუნქციონირებს შემდეგი წრეები:
[checklist]
- ევროპული ცეკვა
- ფსიქოლოგის ერთი საათი
- ხატვა-ძერწვა
- ჭადრაკი
- თოჯინების დასი
- გობელენი, ბატიკა, თექა – პედაგოგი: თამარ ჩიმაკაძე
- მაკეტებზე მუშაობა – პედაგოგი: ნინო როგავა
- სიმღერის წრე – პედაგოგი: ხატია ჭანუყვაძე
- თეორიული მსოფლიო ლიტერატურა – პედაგოგი: ნინო ლაზიშვილი
- ეთიკა – პედაგოგი: ნინო ღლონტი
- ხელოვნების ისტორია – პედაგოგი: ლალი კონცელიძე
[/checklist]
– რა გეგმები გაქვთ სამომავლოდ?
სამომავლოდ ვფიქრობთ უფრო გავიზრდებით და ჩამოყალიბდება ასაკობრივი ჯგუფები, მოვაწყობთ გამოფენებს და ვაჩვენებთ სპექტაკლებს ქალაქის მასშტაბით. ვგეგმავთ, მოვიწვიოთ ცნობილი მხატვრები, მსახიობები, მუსიკოსები, რომლებიც ჩაატარებენ მასტერკლასებს.
ნინო ლაზიშვილი: შაბათი-კვირა ჩემი შვილისთვის ფერადი სამყაროა. ბედნიერი ვარ, რომ მარიამი ბედნიერია. მიხარია, მიყვარს, მეღიმილება. „ნიკე+“ ბევრი დადებითი ემოციისა თუ ,,პლუსის“ შემომტანია ჩვენთან. აბა რა უნდა იყოს მშობლისთვის იმაზე კარგი, როცა შვილს მოუხარია სტუდიისკენ.
მაია აბულაძე: ძალიან მომწონს ხელოვნების ასეთი კომპლექსური მეთოდით მიწოდება. ბავშვები ცოდნას სიამოვნებით იძენენ და მოსაწყენი არ არის მათთვის ეს დრო. „ნიკე+“-ში გატარებული ყოველი საათი ახალი ურთიერთობის და ვირტუალურ სამყაროსაგან ჩამოშორების საუკეთესი საშუალებაა ბავშვისთვის.
თინათინ ჭეიშვილი: „ნიკე+“ ერთი პატარა ოჯახია. ხალისით აღსავსე თხუთმეტი გოგო-ბიჭი საოცრად ავსებს და ახალისებს სტუდიის სამყაროს. ჟრიამული, ოვაციები, შეძახილები არ წყდება. სიყვარული და პატივისცემა მეგობარ-პედაგოგების მიმართ უფრო და უფრო იმატებს. ამ ყველაფრის მხილველი ვარ მე, ერეკლეს დედა, ყოველ კვირას.
