კამპანიის ფარგლებში „გამომყევი აჭარაში“ ქართველმა ბლოგერებმა და ინფლუენსერებმა ფოტო-ვიდეოკონტენტით თავიანთ გამომწერებს გააცნეს აჭარის კულტურა, კულინარია, ფოლკლორი, კულტურული და არამატერიალური კულტურული მემკვიდრეობა.
კამპანიის მთავარი პრიზების გამარჯვებულები ბათუმში საზეიმოდ დაჯილდოვდნენ. პირველი ადგილი ქუთაისელმა ქუჩის ფოტოგრაფმა დავით ოქროპილაშვილმა მოიპოვა, დავითს გამომწერები დანტესის სახელით იცნობენ.
ორი თვის განმავლობაში მის მიერ აჭარაში მოგზაურობაზე გამოქვეყნებულმა კონტენტმა 33 მილიონამდე გამოხმაურება (reach) დააგროვა.
დავით ოქროპილაშვილი ქუთაისელი ქუჩის ფოტოგრაფია, მონაწილე, რომელიც პირველივე დღიდან ჩაერთო პროექტში „გამომყევი აჭარაში“, მოინახულა აჭარის ყველა მუნიციპალიტეტი და მთელ საქართველოს გააცნო აჭარის საოცარი ბუნება, კულტურა და ხალხი. აქამდე მხოლოდ რამდენჯერმე იყო ნამყოფი ბათუმში და აჭარა მისთვის ბათუმთან და ზღვასთან ასოცირდებოდა:
„ამ კამპანიის შემდეგ ყველაფერი შეიცვალა, აჭარა ჩემთვის ახლა ბევრად მრავალფეროვანია, ეს მთები, ბუნება და ადამიანები არასდროს დამავიწყდება, პირველად აღმოვჩნდი წელს აჭარის მთიანეთში კამპანიის ფარგლებში“ – ამბობს კამპანიის პირველი ადგილის მფლობელი ბლოგერი.
მეორე ადგილი ინფლუენსერმა სალი წვერავამ დაიკავა.
გამარჯვება ასევე მოიპოვეს მოგზაურ-ინფლუენსერებმა ტიტე მიქაძემ:
ზურა გელაშვილმა:
ფუდბლოგერმა ანა მითაიშვილმა:
„მე ფუდბლოგერი ვარ და გასტრონომიაზე იყო ორიენტირებული ჩემი კონტენტი, ძირითადად კერძებით გავაცანი აჭარა ჩემს მიმდევრებს.
თუ არ დავივიწყებთ ძველ ტრადციულ კერძებს და პოპულარიზაციას გავუკეთებთ რესტორნებშიც გაცილებით დიდი იქნება დაინტერესება აჭარის რეგიონით, რადგან ადამიანი საქართველოში რომ ჩამოდის გასტრონომიული კუთხითაც აინტერესებს ქვეყანა, ჩვენი რესტორნები კი ძირითადად ევროპულ სამზარეულოს სთავაზობენ მომხმარებელს“ – ამბობს კამპანიის ერთ-ერთი გამარჯვებული ანა მითაიშვილი.
ორი თვის განმავლობაში ბლოგერების მიერ აჭარის შესახებ სოციალურ მედიაში გამოქვეყნებულმა კონტენტმა ასიათასობით ქართველს გააცნო რეგიონის მრავალფეროვანი ტურისტული პროდუქტები.
აჭარის ტურიზმის დეპარტამენტმა შიდა ტურიზმის ხელშესაწყობად კამპანია „გამომყევი აჭარაში“ წელს პირველად განახორციელა. კამპანია 15 აგვისტოს დაიწყო და 15 ოქტომბერს დასრულდა.
დარეგისტრირდა 50-მდე მონაწილე, თუმცა მათ შორის ყველაზე კარგი შედეგები იმ ცნობილმა ბლოგერ-ინფლუენსერებმა აჩვენეს, რომლებიც აჭარაში მოგზაურობის შთაბეჭდილებებსა და რეკომენდაციებს აქტიურად უზიარებდნენ ასიათასობით გამომწერს.
კამპანიის შემაჯამებელ ღონისძიებას დაესწრნენ ინფლუენსერები, მოგზაურები, ფოტოგრაფები, ჟურნალისტები და ტურიზმის სექტორის წარმომადგენლები.
ზურა გელაშვილიც კონკურსის ერთ-ერთი გამარჯვებულია. ბოლო ხუთი წელია ზაფხულობით ერთ თვეს მაინც ატარებს აჭარაში და დარწმუნებულია, რომ სამთო-სათხილამურო კურორტი გოდერძი გზის მშენებლობის დასრულების შემდეგ მნიშვნელოვან კონკურენციას გაუწევს ბაკურიანსა და გუდაურს:
„სამთვენახევარი გავატარე წელს აჭარაში, მრავალფეროვნებით გამორჩეული მხარეა, ჩემს კონტენტს აჭარაზე ექვსი მილიონზე მეტი გამოხმაურება ჰქონდა, მეოთხე ადგილზე გავედი.
ამ კონკურსის შედეგად შეიქმნა ისეთი და იმ რაოდენობის ფოტო და ვიდეომასალა, რაც სამუდამოდ დარჩება, კადრები, რაც ყოველთვის მიიზიდავს როგორც ქართველებს, ასევე უცხოელ ტურისტებს, ეს დიდი ვიზუალური რესურსია, მსგავსი კონტენტის შექმნა და დაგროვება მარტივი არ არის“ – ამბობს ზურა გელაშვილი.
აჭარის ტურიზმის დეპარტამენტის ხელმძღვანელი, თინათინ ზოიძე აღნიშნავს, რომ კამპანიაში ჩართული 50 ბლოგერისგან მართალია გაიმარჯვა ექვსმა, მაგრამ გამარჯვებულებთან ერთად კამპანიისთვის დიდი შრომა გასწიეს დანარჩენმა მონაწილეებმაც, რომელთა კონტენტსაც 200, 300 ათასამდე გამოხმაურება ჰქონდა:
„ამ კამპანიის მიზანი შიდა ტურიზმის ხელშეწყობა იყო, ჩვენ ყოველწლიურად ვახორციელებთ სხვადასხვა ტიპის კამპანიას შიდა ტურიზმის პოპულარიზაციისთვის.
ყველა ტიპის ბლოგერს მივეცით შესაძლებლობა ემოგზაურათ აჭარაში და ჩართულიყვნენ კამპანიაში, მოლოდინებს გადააჭარბა შედეგმა და გამოხმაურებებმა. ფოტო და ვიდეო-კონტენტის გამოხმაურებამ 100 მილიონს გადააჭარბა. ეს ნიშნავს რომ საქართველოს ყველა რეგიონის დაფარვა შევძელით.
კამპანია „გამომყევი აჭარაში”, გამარჯვებულთა დაჯილდოება. [batumelebi.ge]
მნიშვნელოვანია ის, რომ ეს არ იყო გარეკლამებული ე.წ. დაბუსტული კონტენტი.
კამპანიის საშუალებით აჭარის ახალი ადგილები, ტურისტული მარშრუტები გაიცნო მთელმა საქართველომ და ეს გააკეთეს ადგილობრივმა ბლოგერებმა, ინფლუანსერებმა. თავადაც გაიცნეს აჭარა და გააცნეს მათ მრავალრიცხოვან მიმდევრებსაც“-ამბობს თინა ზოიძე.
მისი თქმით სამომავლოდ ამ პროექტის დახვეწა და გამრავალფეროვნება იგეგმება. დაკვირვებამ აჩვენა, რომ ვიდეომასალას გაცილებით მეტი ნახვა აქვს სოციალურ ქსელებში ყოველთვის და შესაბამისად კამპანიის მიმდინარეობისას ძალიან კარგმა ფოტოკონტენტმა ვერ გაუწია კონკურენცია ვიდეომასალებს, რაც არ ნიშნავს იმას, რომ რამით ნაკლებმნიშვნელოვანია რეგიონის პოპულარიზაციისთვის ფოტოკონტენტი:
„ამ მოცემულობის გათვალისწინებით შიდა ტურიზმის პოპულარიზაციისთვის შესაძლოა ფოტობლოგერებთან ერთად მომავალში ცალკე პროექტიც დავგეგმოთ, რომლის საშუალებითაც ფოტოგრაფებს მიეცემათ საკუთარი შესაძლებლობების სრულად წარმოჩენის საშუალება“ – ამბობს ტურიზმის დეპარტამენტის ხელმძღვანელი.
