არასამთავრობო ორგანიზაციის განცხადებით, 2012 წლის 26 იანვარს, ,,ტელეარხი 25’’-ის გადაცემა „დიალოგი“-ს პირდაპირ ეთერში, ბათუმის სახელმწიფო საზღვაო აკადემიის რექტორმა, ნიკოლოზ წიკლაურმა „დემოკრატიის ინსტიტუტის“ მისამართით საქმიანი რეპუტაციის შემლახავი, არასწორი ინფორმაცია გაავრცელა. კერძოდ, სატელევიზიო გადაცემის პირდაპირ ეთერში ნიკოლოზ წიკლაურმა განაცხადა: ,,თამამად შემიძლია ვთქვა, რომ რაღაც ეტაპზე მიატოვეს (გულისხმობდა ილია ნარეკლიშვილს), რადგან არც გამოჩენილან, არც მობრძანებულან’’ (გულისხმობდა დემოკრატიის ინსტიტუტს).

„დემოკრატიის ინსტიტუტი, რომელიც პატიმრობაში მყოფ და პატიმრობიდან განთავისუფლებული პირების ადვოკატირებისა და რეაბილიტაციის მიმართულებით სხვადასხვა საერთაშორისო ორგანიზაციების (ევროკავშირი, გაეროს ბავშვთა ფონდი და ა.შ.) მხარდაჭერით მუშაობს, მნიშვნელოვნად უფრთხილდება ორგანიზაციისა და თანამშრომლების ავტორიტეტს, საქმიან რეპუტაციასა და ნდობის ხარისხს, რადგანაც სწორედ ზემოთაღნიშნულ ფაქტორებზეა დამოკიდებული ყოფილ პატიმართა მხრიდან ნდობის გამოვლენა, მათთან მიზნობრივი მუშაობა და რაც მთავარია, მათი საზოგადოებაში რეინტეგრაციის მიღწევა.“- აღნიშნულია განცხადებაში, რომელიც არასამთავრობო ორგანიზაციამ დღეს გაავრცელა.

დემოკრატიის ინსტიტუტი სარჩელით მიმართავს ბათუმის საქალაქო სასამართლოს და მოითხოვს, რომ დაევალოს ნიკოლოზ წიკლაურს იმავე ,,ტელეარხი 25’’-ის პირდაპირი ეთერით, არასწორი ინფორმაციის გავრცელების ფორმატის გადაცემაში, გააკეთოს საჯარო განცხადება, რომლითაც უარყოფს მის მიერ გავრცელებულ ინფორმაციას.

ცაგო კახაბერიძე

მამა მარკოზის თქმით უახლოეს დღეებში ქართველი მეომრების საფლავებთან ქვაში გამოკვეთილი ჯვარცმა აღიმართება, ოთხ მარტს კი ამ ადგილას წირვა ჩატარდება რასაც „არამარტო აჭარის არამედ სრულიად საქართველოს სამღვდელოება და მრევლი დაესწრება.“

კითხვაზე მეომართა საფლავებთან ჯვრის აღმართვის გადაწყვეტილება უკავშირდება თუ არა აზიზეის მეჩეთის შესაძლო აღდგენის შესახებ გავრცელებულ ინფორამაციას? მამა მარკოზი პასუხობს: „მინდა კიდევ ერთხელ დავაფიქსირო ეკლესიის პოზიცია იმ თემასთან დაკავშირებით რაზეც ამდენი ხანია პოლემიკა მიმდინარეობს, აწუხებს საზოგადეოებას და ბუნებრივია უნდა აწუხებდეს. მეჩეთების მშენებლობა აჭარაში არ იზღუდება და არც შეზღუდულა არასდროს, ამის ნათელი მაგალითია ის, რომ აჭარაში 150 მეჩეთი და 45 ეკლესიაა, მინდა ეს კარგად გაიგოს ყველამ და განსაკუთრებით თქვენ ჟურნალისტებმა მინდა გთხოვოთ მიაქციოთ ყურადღება ამ ციფრებს. საუბარი იმაზე, რომ თითქოს ჩვენ ვართ მეჩეთების წინააღმდეგი – ეს არის უბრალოდ ცილისწამება, აბსურდი და რათქმაუნდა მე ვფიქრობ მიზანმიმართული პროვოკაციული განცხადება, რათა  მოხდეს ქრისტიანებსა და მუსლიმანებს შორის რაიმე დაპირისპირება. კიდევ ერთხელ ვიმეორებ აჭარაში 150 მეჩეთი და 45 ეკლესიაა და აქედან გამომდინარე რომელი რომელს დევნის… პირიქითაც შეიძლება იფიქროს ვინმემ.

რაც შეეხება აზიზიეს მეჩეთის მშენებლობას ეკლესიის პოზიცია არის ასეთი, რომ აზიზიეს სახელობის მეჩეთის მშენებლობის წინააღმდეგია მოსახლეობაც და მათ შორის ჩვენც. მეჩეთები შენდება და არავინ ხელს არ უშლის ამას, მაგრამ ეს  იყო დამპყრობელის სახელზე აგებული მეჩეთი, ამიტომ ის არ უნდა აშენდეს აჭარაში მითუმეტეს  სხვა სახელმწიფოს დაფინანსებითა და ზედამხედველობით. აი ეს არის ეკლესიის პოზიცია.“

„საზაფხულო თეატრი ბათუმელთათვის და ქალაქის სტუმრებისთვის ერთ–ერთ უსაყვარლეს თავშეყრის ადგილს წარმოადგენდა. იგი თავის პირვანდელ ადგილზე ამიტომაც აშენდება. მნიშვნელოვანია ისიც, რომ მშენებლობასა და მოხატვაზე ადგილობრივები დასაქმდებიან,“ – აღნიშნა ლევან ვარშლომიძემ.

საზაფხულო თეატრი 1947 წელს არქიტექტორების: კახა ჯავახიშვილისა და ბოგდან კირაკოსიანის პროექტით შესრულდა. იგი თავისი ეპოქისთვის შესაფერის – ეგრეთწოდებული “სტალინის ბაროკოს” სტილში იყო შესრულებული და 590 მაყურებელს იტევდა. შენობა 2001 წელს ხანძრმა გაანადგურა.

წარმოდგენილი პროექტის თანახმად, ახალი შენობა დიდი იქნება და 1100 მაყურებელს დაიტევს, სადაც შესაძლებელი იქნება როგორც თეატრალური, ასევე საესტრადო წარმოდგენების დადგმაც.

ოთო დალაქიშვილი

რა შეზღუდვები უწესდებათ კანონით ფიზიკურ პირებს – მოქალაქეებს, ამომრჩევლებს და რა შეიძლება ჩაითვალოს ამომრჩევლის მოსყიდვად? რა სასჯელს ითვალისწინებს კანონი ამ მუხლის დარღვევის შემთხვევაში?
არასამთავრობო ორგანიზაციების წარმომადგენლები აცხადებენ, რომ პოლიტიკური პარტიის ან პოლიტიკურად აქტიური პირისგან დახმარების მიღების ან თუნდაც თხოვნის გამო, შესაძლოა, ამომრჩეველს 3 წლით აღეკვეთოს თავისუფლება.
სისხლის სამართლის კოდექსის 1641-ე მუხლში აღნიშნულია, რომ “პოლიტიკური მიზნით, პირდაპირ ან არაპირდაპირ ფულის, ფასიანი ქაღალდის (მათ შორის, ფინანსური ინსტრუმენტის), სხვა ქონების, ქონებრივი უფლების, მომსახურების ან სხვა რაიმე უპირატესობის შეთავაზება, დაპირება, გადაცემა ან გაწევა, ან წინასწარი შეცნობით ასეთის მოთხოვნა ან მიღება, ანდა კანონით დადგენილი შეზღუდვებისთვის თავის არიდების მიზნით მოჩვენებითი, თვალთმაქცური ან სხვა გარიგების დადება – ისჯება თავისუფლების აღკვეთით ვადით სამ წლამდე ან ჯარიმით.”
არასამთავრობოებს ამ მუხლთან დაკავშირებით ასეთი მაგალითი მოჰყავთ:
“თუ შენი მეგობრის დედასთან მივიდა მმართველი პარტიის წარმომადგენელი და ქირურგიული ოპერაციის ღირებულების დასაფარად შესთავაზა თხოვნის წერილის დაწერა მერიის სოციალური სამსახურისა და მმართველი პარტიის სახელზე, ასეთი განცხადების დაწერა, შესაძლოა, გახდეს შენი მეგობრის დედის 3 წლამდე თავისუფლების აღკვეთის საფუძველი.”
ან `თუ შენს სამეზობლოს ესტუმრა შენი ოლქის მაჟორიტარი დეპუტატი და დაგირიგათ საჩუქრები, ამის გამო, შესაძლოა 3 წლით აღეკვეთოს თავისუფლება.”
პარლამენტის იურიდიული კომიტეტის თავმჯდომარე პავლე კუბლაშვილი არ ეთანხმება არასამთავრობოების მხრიდან გამოთქმულ ამ მოსაზრებებს და საკუთარ პოზიციას შემდეგნაირად ამყარებს: `თუ საარჩევნო ხმის სანაცვლოდ ვიღაცა აძლევს, ან პირდება თანხას, ფასიან ნივთებს და ა.შ. ამ შემთხვევაში ეს უნდა იყოს დასჯადი. თუ ვიღაცა ვაჭრობს საკუთარი ხმით, ესეც უნდა იყოს დასჯადი. თუ მიაქცევთ ყურადღებას, ეს არ არის ის შემთხვევა, რომ ვიღაცას უცებ მოუგონებენ რაღაცას და დაიჭერენ, ან ჯარიმას დააკისრებენ და ა.შ. ეს არის იმ შემთხვევაში და პირდაპირ წერია ეს ნორმაში, როცა წინასწარ შეცნობით ამომრჩეველი ითხოვს გარკვეულ საფასურს თავისი ხმის სანაცვლოდ. ეს, რა თქმა უნდა, უნდა იყოს დასჯადი. მე ვფიქრობ, რომ აქ რაიმე საწინააღმდეგო არგუმენტი არასწორია,“ _ აღნიშნავს კუბლაშვილი და აქვე ერთმანეთისგან გამოყოფს ბიუჯეტიდან დაფინანსებულ სოციალურ პროექტებსა და ცალკეული პარტიის მიერ გაცემულ დაპირებას:
`თუ ჩვენ ვსაუბრობთ სოციალურ პროექტებზე, მერიის ბიუჯეტით გათვალისწინებულ ქმედებებზე, ბუნებრივია, ეს არის აბსოლუტურად სხვა სიბრტყე. ეს არის ის არჩევანი, რომელიც ამომრჩეველმა მანამდე გააკეთა და ეს არჩევანი აძლევს შესაძლებლობას ვიღაცას, განკარგოს ბიუჯეტი, თქვას, ამდენი ამ პირობებით დაიხარჯება გზებზე, მოედნებზე, პენსიებზე და ა.შ. თუ ვიღაცა ამბობს, რომ მერია ინდივიდუალურად რომელიმე ერთი კონკრეტული ადამიანისთვის შემოიღებს საჩუქარს, რა თქმა უნდა, ამ შემთხვევაზე გავრცელდება პასუხისმგებლობა, მაგრამ თუ ეს არის ბიუჯეტიდან თანხების გაცემა სოციალური პროგრამებისთვის, ინფრასტრუქტურული პროექტებისთვის და ა.შ. – არა,” _ განაცხდა კუბლაშვილმა.
კუბლაშვილისეული განმარტების მიუხედავად, არასამთავრობოები არ ცვლიან მოსაზრებას. ოთხმა არასამთავრობო ორგანიზაციამ (`საერთაშორისო გამჭვირვალობა, საქართველო”, `ახალგაზრდა იურისტთა ასოციაცია”, `სამართლიანი არჩევნები” და კოალიცია `არჩევანის თავისუფლებისათვის”) პარლამენტში 17 თებერვალს მათ მიერ მომზადებული ალტერნატიული საკანონმდებლო წინადადება წარადგინა.
საკანონმდებლო წინადადება პარლამენტის ბიურომ 5 დღის ვადაში უნდა განიხილოს და განსაზღვროს წამყვანი კომიტეტი, რომელიც ამ წინადადების განხილვაზე იქნება პასუხისმგებელი, ამის შემდეგ კომიტეტს აქვს 20 დღის ვადა წინადადების განხილვისთვის.
კუბლაშვილის თქმით, `თუ პრაქტიკა გვაჩვენებს, რომ მნიშვნელოვანია რაღაც ცვლილებები, რაღაცის დაზუსტება ამ კანონში, რა თქმა უნდა, მაგ ნაბიჯებზე წავალთ და უარს არ ვიტყვით.”
`თუკი პარლამენტი წინადადებას მიიღებს და აქცევს მას საკანონმდებლო ინიციატივად, ამ კანონმდებლობის შეცვლის კუთხით წარმოება გაგრძელდება, თუმცა შესაძლოა პარლამენტმა ამ საკანონმდებლო წინადადების ინიციატივად ქცევაზე უარი თქვას, რაც მიუღებელია, რადგან ეს კანონმდებლობა ანტიკონსტიტუციურია”, _ აცხადებს “ახალგაზრდა იურისტთა ასოციაციის” იურისტი ეკა ფოფხაძე.

სამხედრო მოსამსახურეები, რომლებიც ასრულებდნენ საბრძოლო ამოცანას, დაიღუპნენ საბრძოლო მანქანის აფეთქების შედეგად თალიბებთან შეტაკებისას.

გარდაცვლილი სამხედრო მოსამსახურეები მე-3 ქვეითი ბრიგადის 31–ე მსუბუქი ქვეითი ბატალიონის შემადგენლობაში ISAF-ის სამშვიდობო მისიის ფარგლებში ჰელმანდის პროვინციაში მსახურობდნენ.
mod.gov.ge

საქველმოქმედო ფონდის მხარდამჭერი აქცია

დღეს 21 თებერვალს, ბათუმში ზვიად გამსახურდიასა და ზუბალაშვილის ქუჩების კვეთაში, იქ სადაც წლების განმავლობაში „წმ. ნინოსა და წმ. ფრანჩესკას სახელობის საქველმოქმედო ფონდი“-ს მიერ დაარსებული დედათა და ბავშვთა თავშესაფარი ფუნქციონირებდა, საპროტესტო აქცია გაიმართა. ფონდის ხელმძღვანელი სვეტა კუდბა და საზოგადოების წარმომადგენლები, საქველმოქმედო ფონდისთვის შენობის წარტმევის ფაქტს აპროტესტებდნენ.

აჭარის ეკონომიკის სამინისტრომ შენობა საქველმოქმედო ფონდს გასულ წელს წაართვა და შემდეგ დაანგრია, დედათა და ბავშვთა თავშესაფარის გარდა შენობაში უფასო სასადილოც ფუნქციონირებდა, სადაც ასამდე მიუსაფარი ადამიანი ყოველდღიურად იკვებებოდა.

„ზუსტად ერთი წლის წინ, 21 თებერვალს გამოაძევეს საქველმოქმედო  ფონდი შენობიდან. ხელისუფლების მხრიდან, კერძოდ ეკონომიკის სამინისტროსგან იყო დაპირება რომ გამოგვიყოფდა ალტერნატიულ ფართს და ამის დამამტკიცებელი წერილებიც მაქვს. 2011 წელს, როცა ვაპირებდით შენობის დაცლას, ეკონომიკის სამინისტრომ წერილობითაც მოგვმართა სადაც გვთხოვდა განგვემარტა თუ რისთვის გვჭირდებოდა ფართი. განვიხილავთ წერილს და შენობას გამოგიყოფთო. ფონდმა ზუსტად სამ დღეში წარუდგინა პროექტი, თუმცა ამის შემდეგ სამინისტროსგან პასუხი აღარ მიგვიღია“.

ეკონომიკის სამინისტრომ საქველმოქმედო ფონდის გამოსახლების შემდეგ განაცხადა რომ ტერიტორია აუქციონზე უნდა გაყიდულიყო, თუმცა სადაო ადგილი სამინისტროს დღემდე არ გაუსხვისებია. „როგორც ჩვენ გვითხრეს პარკინგის გაკეთებას აპირებენ. ხელისუფლებისთვის ავტომანქანები უფრო მნიშვნელოვანია ვიდრე ათობით მშიერი და უსახლკარო ადამიანი ვისაც ფონდი დახმარებას უწევდა“ -ამბობს, სვეტა კუდბა.

საქველმოქმედო ფონდმა ეკონომიკის სამინისტროს სასამართლოში უჩივლა.  დღეს საქმე საქართველოს უზენაეს სასამართლოშია.

სვეტა კუდბა ამბობს, რომ საქველმოქმედო ფონდისთვის ფართის გამოყოფის თხოვნით, 2008 წელს ბათუმის მერიას და საკრებულოსაც მიმართა: „ვთხოვეთ განეხილათ საკითხი, მაგრამ პასუხი დღემდე არ მიგვიღია. არ გამოგვხმაურებია არც აჭარის მთავრობის თავმჯდომარე, ლევან ვარშალომიძე, რომელსაც ასევე გადაეგზავნა ჩვენი წერილები.  ამჯერად მოვითხოვთ რომ შეგვხვდეს მთავრობის თავმჯდომარე და მოგვისმინოს“.

ცაგო კახაბერიძე

შავი ზღვის სანაპირო ზოლის ბათიმეტრიული კვლევა 2011 წლის ნოემბრიდან დაიწყო და პირველ აპრილამდე გაგრძელდება. მიზნობრივ პროგრამას აჭარის გარემოს დაცვის სამმართველო ახორციელებს. კვლევების ფარგლებში მდინარე ნატანებიდან შავი ზღვის სარფის მონაკვეთამდე არსებული პლაჟის, წყალქვეშა ფერდის, ზღვის კიდის ხაზის გადაადგილების მდგომარეობისა და კლდოვანი ნაპირების შესწავლა ხორციელდება. სამუშაოებს ტენდერში გამარჯვებული კომპანია „ჰიდროსფერო“ აწარმოებს.

აჭარის გარემოს დაცვის სამმართველოს ბიომრავალფეროვნებისა და გარემოს ინტეგრირებული მართვის სამსახურის ხელმძღვანელის ნოდარ კონცელიძის ინფორმაციით, სანაპიროდან ხუთასამდე მეტრ მანძილზე სიღრმეები, ჭრილებს შორის კი 20-მდე მეტრი მანძილი შეისწავლება. „კვლევის დასრულების შემდეგ ჩვენ გვექნება სარფიდან მდინარე ნატანების ჩათვლით შავი ზღვის სანაპირო ზოლის ტოპოგრაფიული გეგმა, სანაპიროს მორფოდინამიკა და ზღვის კიდის ხაზის გადაადგილების შესახებ ინფორმაცია. მოხდება ასევე ბოლო წლებში შესრულებული სამუშაოებისა და ახლანდელ მდგომარეობას შორის შედარება იმის გასარკვევად, თუ რა ცვლილებები განიცადა ადრეული წლებიდან მოყოლებული დღემდე შავი ზღვის სანაპირო ზოლმა ამა თუ იმ მონაკვეთზე, ეს ძირითადად ზღვის დონეებს შეეხება.“

კვლევების ჩატარებისათვის სპეციალისტებს 2 კილომეტრამდე სიღრმეში გასვლა უხდებათ, გარემოს დაცვის სამმართველოს მოთხოვნით ჩვეულებრივ პლაჟებზე მათ ათ მეტრამდე სიღმის შესწავლა ე.წ „კანიონებთან“ კი 50 მეტრამდე სიღრმის შესწავლა უნდა განახორციელონ. სანაპირო ზოლის იმ მონაკვეთებში, სადაც უმეტესწილად კლდოვანი ქანებია, ზღვის დონეების გადაადგილების განსაზღვრა 20 მეტრამდე სიღრმეში უნდა მოხდეს.

ახალმა ტოპოგრაფიულმა მონაცემებმა გარემოს დამცველებს სანაპირო ზოლზე ტურისტული ინფრასტრუქტურისათვის მდგრადი მონაკვეთების მონიშვნის საშუალება უნდა მისცეს. ნოდარ კონცელიძის ინფომარციით, ამ კვლევის შემდეგ განისაზღვრება ასევე მონაკვეთები, სადაც საშუალო სიდიდის ტურისტული კრუიზის გადაადგილება იქნება შესაძლებელი. ნოდარ კონცელიძე სანაპირო ზოლზე „არც ნავმისადგომის ან სხვა ტიპის, მაგალითად, სასტუმროების  მშენებლობების დაგეგმვას“ გამორიცხავს.

მოზნობრივი პროგრამა აჭარის გარემოს დაცვის სამმართველომ შეიმუშავა და მისი განხორციელებისათვის 78 000 ლარი დაიხარჯება.

ნათია ზოიძე

ყოფილი უნივერმაღის შენობასთან ჩაქვის მიკროავტობუსები ჩერდება და მგზავრების შევსებისთანავე გადის. მანამდე მგზავრს რაც გევალება, 80 თეთრის გადახდაა არა მძღოლისთვის, არამედ ბატონი ნოდარისთვის (კურატორისთვის), მაგრამ თუ ბატონ ნოდარს იმასაც ეტყვი, რომ უმაღლეს საბჭოში მიდიხარ, მძღოლი დამატებით ინსტრუქციას მიიღებს _ უმაღლესი საბჭოს შენობასთან მიგიყვანოს.
სამარშრუტო ტაქსში ჟურნალისტებთან კონტაქტის სურვილი არ აქვთ, ჩვენს კითხვას _ უმაღლესი საბჭოს ჩაქვში გადმოტანა კარგია თუ ცუდი _ მხოლოდ ერთი ეხმაურება, და ისიც ბატონო ნოდარი: „ცუდი რატომ იქნება, ისე, ჯერ არ დაგვჭირვებია, არც მათ დავჭირვებივართ.“
უმაღლესი საბჭოს თანამშრომელი: „ეს ამ ორგანოს დისკრედიტაციაა, აქ ვინ მოვა. რომ გათოვდა, ორი დღე ჩვენ ვერ მოვედით სამსახურში. ჩვენთან ძირითადად ქედის, ხულოსა და შუახევის მოსახლეობა დადიოდა. ავტონომიის გაუქმებისკენ მიჰყავთ ყველაფერი, მაღალ შენობაში რომ ვიჯექით, შენობა ლამის თავზე დაგვანგრიეს, ქვემოთ სხდომა მიდიოდა და ზემოთ მშენებლებმა დემონტაჟი დაიწყეს.“
უმაღლესი საბჭოს ახალი შენობა შემაღლებულზე, მაგისტრალიდან 500-600 მეტრის დაშორებით მდებარეობს. აქ ვერსად ნახავთ ნიშნულს, რაც მიგანიშნებთ, რომ ზემოთ, გორაკზე, რეგიონის საკანონმდებლო ორგანო მდებარეობს. მუნიციპალიტეტს აბრის დამზადებაზე ტენდერი ჯერ არ გამოუცხადებია.
საშვთა ბიუროს მიერ ჩემთვის მოწოდებულ საშვზე ერთი დეტალი იქცევს ყურადღებას: 14 თებერვლის 10:30 წუთის მდგომარეობით, უმაღლეს საბჭოში 170-ე ვიზიტორი ვარ.
ახალ იურიდიულ მისამართზე უმაღლესი საბჭო 30 დეკემბრიდან გაავიდა. 3000 კვ. მეტრის შენობა აპარატის 75 თანამშრომლისა და 18 დეპუტატის სამუშაო გარემოა.
ოპოზიციონერი `ქრისტიან-დემოკრატი~ ნიაზ ზოსიძე ამბობს, რომ ბათუმში, საშუალოდ, ყოველდღიურად 30-40 მოქალაქეს იღებდა, ახლა კი ეს ციფრი საშუალოდ სამ მოქალაქემდე შემცირდა.
ახალი უმაღლესი საბჭოს შენობის გარემონტება და რეკონსტრუქცია 2 189 600 ლარი დაჯდა. ამ თანხიდან მშენებელმა კომპანიამ მხოლოდ 6 000 ათასი ლარი ვერ აითვისა და უკან დააბრუნა. თავის დროზე უმაღლესი საბჭოს შენობის რეკონსტრუქციის უფლება პარლამენტარ ბათუმის მაჟორიტარ დეპუტატ თემურ ჩარკვიანის მიერ დაფუძნებულმა კომპანიამ მიიღო. ამ კომპანიამ მაშინ მხოლოდ 20 ლარის უპირატესობით გაიმარჯვა შპს „ზუგო მშენზე“. ამ საკითხზე გაზეთმა „ბათუმელებმა“ 2011 წლის ივნისის ნომერში მოამზადა სტატია. გაზეთ „ბათუმელებთან“ თემურ ჩარკვიანმაც დაადასტურა, რომ ეს კომპანია მის მიერ იყო დაფუძნებული. კითხვებზე პასუხის გასაცემად კი ჩარკვიანმა საკრებულოს წევრ ბესიკ ჭოხონელიძესთან გადაგვამისამართა, როგორც სამუშოების მწარმოებელთან.
რით განსხვავდება ახალი უმაღლესი საბჭოს შენობა ძველისგან?
3-სართულიან შენობაში 75 სამუშაო კაბინეტია. არის ცალკე ბიუროს სხდომათა დარბაზი და ორი ღია აივანი ზღვის ხედით. ერთ დეპუტატზე ერთი კაბინეტი მოდის. კომისის თავჯდომარეების კაბინეტები რიგითი დეპუტატების კაბინეტებისაგან რა თქმა უნდა განსხვავდება. კომისიის თავჯდომარეების კაბინეტს დამატებით სველი წერტილი აქვს, საბჭოს თავმჯდომარის მოადგილის კაბინეტს კი _ პატარა მოსასვენებელი ოთახიც. სართულების ბოლოში საერთო სველი წერტილებია. საპირფარეშოში, ე.წ. „თურქულ ტუალეტებში“ კაფელი ისეა მიმაგრებული კედელზე, რომ საბჭოთა კავშირს გაახსენებს მას, ვისაც ამ ეპოქაში ბავშვობა გაუტარებია.
ლიფტი ჯერ ჩართული არ არის, თეთრად შეღებილი კედლები კი დაბზარულია, კარი ყველა კაბინეტს შავი აქვს, მაგრამ უკვე გაჩენილი ნაკაწრებით. აპარატის უფროსს ლევან ხოზრევანიძეს ვეკითხებით: „ეს რისი ბრალია? უხარისხო სამშენებლო მასალების თუ დაჩქარებული ვადების?“
„_ არც ერთის და არც _ მეორის, აქ ნესტია, მშენებელს აღებული აქვს ვალდებულება და რაც გაფუჭდება, ხელმეორედ გააკეთებს. ჯერ მიღება-ჩაბარების აქტი გაფორმებული არ არის, სამხარეულის სახელობის ექსპერტიზის ცენტრიდან მოვიწვიეთ ექსპერტები, მათ გარე ფასადი დაიწუნეს და ხელმეორედ გავაკეთებინეთ, აგურები, რომლებზეც ნესტი იყო გამოსული, გაფხიკეს და გააპრიალეს. ექსპერტებმა კარის სახელურებზე თქვეს, რომ უხარისხოა და ისიც გამოიცვლა, მათ სხვა შენიშვნები არ ჰქონიათ.“
ექსპერტიზას ელექტროგაყვანილობა არ დაუწუნია, თუმცა უმაღლესი საბჭოს სხდომათა დარბაზი, რომელიც 6 მარტს საგაზაფხულო სესიით გაიხსნება, მნიშნელოვან პრობლემას გადაურჩა. აპარატის უფროსმა სდომათა დარბაზი ჩვენს საჩვენებლად გააღო, 150 კვ. მეტრის დარბაზში კვამლის სუნი იდგა, ერთად აღმოვაჩინეთ, რომ ცენტრალური გათბობის რეგულატორი იწვოდა.
რაც შეეხება ავეჯს, უმაღლესი საბჭოს სხდომათა დარბაზში „ემდეეფისგან“ შეკერილ ავეჯს მალე განათავსებენ.
გამოცხადებულ ტენდერში სამშენებლო კომპანია _ „ვახტანგ აბულაძემ“ გაიმარჯვა და 26 000 ლარად დარბაზის ავეჯით უზრუნველყოფა საკუთარ თავზე აიღო.
ახალ ავეჯს უმაღლესი საბჭო დეპუტატების კაბინეტებისთვისაც შეიძენს. ლევან ხოზრევანიძე ამბობს, რომ ახლა უმრავლესობის კაბინეტში აბაშიძის დროს შეძენილი ავეჯია, რომელიც მწყობრიდან გამოდის. რა თანხა დაიხარჯება მის შესაძენად, ჯერ დაანგარიშებული არ არის. კორექტირება არ შევა მხოლოდ ნიაზ ზოსიძისა და მიხეილ მჟავანაძის კაბინეტებში. აპარატის უფროსი ამბობს, რომ კაბინეტების განახლებაზე მათ უარი თქვეს. დეპუტატების ოთახებიდან გამოტანილ ავეჯს კი აპარატის თანამშრომლების კაბინეტებში გადაანაწილებენ.
უმაღლესი საბჭოს გადასვლის მომენტში ახალ შენობაში ინტერნეტი არ იყო. ინტერნეტზე საკანონმდებლო ორგანოს მხოლოდ ორშაბათიდან მიუწვდება ხელი, „სილქნეტს“ ინეტენეტით უზრუნველყოფისთვის წლის განმავლობაში 12 000 ლარს გადაუხდიან. 3 700 ლარი კი კომპიუტერული ტექნიკის შეძენაში დაიხარჯა.
უმაღლესი საბჭოს ახალ შენობაში დღის 12 საათისთვის რამდენიმე დეპუტატის კაბინეტი დაკეტილი იყო, რამდენიმე კაბინეტში კი პარკში გახვეულ საკვებს შეამჩნევდით მაგიდაზე. უმაღლეს საბჭოს ჯერ სასადილო არ აქვს. სასადილოს მოსაწყობად აუქციონი უნდა გამოცხადდეს. თუმცა სამზარეულო ვინ უნდა უზრუნველყოს ტექნიკით, გამარჯვებულმა თუ თავად უმაღლესმა საბჭომ, დეტალები ჯერ გარკვეული არ არის.
ამ ელექტრონული აუქციონის გამოცხადებას მოუთმენლად ელოდება ჩაქვში უმაღლეს საბჭოსთან მცხოვრები საღინააძეების ოჯახი. ისინი აუცილებლად მიიღებენ მონაწილეობას აუქციონში. 39 წლის ბადრი, რომელსაც სამშენებლო სამხატვრო აკადემია აქვს დამთავრებული, წელიწადში ერთ თვეს ბათუმში ბარმენად მუშაობს. დარწმუნებულია, რომ თუ გაიმარჯვებს „ამ საპასუხისმგებლო საქმეს გაქაჩავს“.
უმაღლეს საბჭოში უკვე 3 ადგილობრივი დაასაქმეს, ერთი დამლაგებელი და ორი ტექნიკური პერსონალი.
ჩაქვში მოსახლებასთან გასაუბრების მცდელობა მაინც და მაინც წარმატებული არ აღმოჩნდა. შეკითხვაზე _ უმაღლესი საბჭოს ჩაქვში გადმოსვლით რა შეიცვლება თქვენს ცხოვრებაში? _ ჩაქვის ცენტრში გაფუჭებული მანქანის ირგვლივ შეკრებელი ადგილობრივებისგან ისევ კითხვითი პასუხი მივიღეთ _ „უკვე აქ არიან? ხედავ, ამოსულან კურორტზე?“
ამ მოწვევის უმაღლეს საბჭოს მხოლოდ რამდენიმე თვეს მოუწევს მუშაობა. ოქტომბერში, არჩევნების შემდეგ, იქ ახალი „დამსვენებლები“ ავლენ.