18.07.2011
by batumelebi.ge
განაწყენებულმა Dark Tranquility-იმ სცენა დროზე ადრე დატოვა
ავტორი: ია ფრანგიშვილი
გუშინ ბათუმში Global east rock festival-ი გაიხსნა. კონცერტი დაახლოებით რვა საათის დაგვიანებით დაიწყო და ერთიანად შეიცვალა პირველი დღის მონაწილეთა სიაც. ნაცვლად რვა ჯგუფისა: Tanelorn (საქართველო),Signs (საქართველო),Carthagods (ტუნისი),Moribund oblivion (თურქეთი),Cemetary of scream (პოლონეთი),W.H.I.T.E. (უკრაინა),Dark tranquility (შვედეთი) და Sabaton (შვედეთი) – ფესტივალის გახსნაზე მხოლოდ Sabaton, Dark Tranquility და Moribund oblivion გამოვიდნენ. გარდა იმისა, რომ ორგანიზატორებმა თავდაპირველად შეპირებული, ბრაზილიური ჯგუფის Sepultura -ს ჩამოყვანა ვერ მოახერხა, რის გამოც განაწყენებულმა მსმენელმა, ბილეთების ღირებულების ანაზღაურებაც კი მოითხოვა მათგან – დღეს დილით, ყველასათვის მოულოდნელად, მათ ფესტივალის ჩატარების ადგილიც შეცვალეს – ნაცვლად ანგისის სტადიონისა, კონცერტი ერას მოედანზე, რამოდენიმე საათის დაგვიანებით დაიწყო. გარკვეული მღელვარება შეინიშნებოდა კონცერტზე თავმოყრილ ახლაგაზრდებშიც, რომელთა უმრავლესობაც უნდობლობას გამოხატავდა ფესტივალის ორგანიზატორების მიმართ და როგორც აღმოჩნდა, არც თუ ისე უმიზეზოდ. კონცერტზე ერთ მეტად უსიამოვნო ფაქტს ჰქონდა ადგილი – Dark Tranquility, რომელიც ფესტივალის ერთ-ერთი მთავარი სტუმარი იყო, აპარატურის გაუმართაობის გამო იძულებული გახდა, გამოსვლა თითქმის ერთი საათით ადრე დაემთავრებინა. მათ ბოდიში მოუხადეს მაყურებელს და მხოლოდ სამი-ოთხი სიმღერით შემოიფარგლენ, რის შემდეგაც „კულისებში“ პირადად შეხვდნენ, ფესტივალის ორგანიზატორებზე გულმოსულ მაყურებელს და მათთან ერთად მოკლე ფოტოსესიაც კი მოაწყვეს. მართალია Global east rock festival-ი ბევრი ხარვეზით გაიხსნა, მაგრამ მთლიანობაში მსმენელი მაინც ბედნიერი ჩანდა, თავისი საყვარელ ჯგუფებთან შეხვედრით და ცოცხალი შესრულების მოსმენით. იმედია ფესტივალის მეორე დღე ბევრად უფრო გამართული იქნება ტექნიკური თვალსაზრისით და ორგანიზატოები უფრო მეტი პასუხისმგებლობით მოეკიდებიან მსმენელის მოთხოვნებს.
Like this:
Be the first to like this post.
